عايز ربنا يتقبل صيامك؟ رجّع الحقوق لأصحابها
احنا في شهر رمضان، شهر المغفرة والرحمة، بس قبل ما تطلب من ربنا يقبل صيامك وقيامك، اسأل نفسك: في حد ليه حق عندي وأنا مأخره؟ في مظلمة لازم أرجعها؟ لأن سيدنا النبي ﷺ قال: "من كان عنده مظلمة لأخيه من عرضه أو شيء، فليتحلله منه اليوم، قبل ألا يكون دينار ولا درهم، إن كان له عمل صالح أُخذ منه بقدر مظلمته، وإن لم تكن له حسنات أُخذ من سيئات صاحبه فحُمل عليه" (رواه البخاري). تخيل إنك صايم وبتقوم الليل، لكن في حد يوم القيامة ياخد من حسناتك لأنك ظلمته في حقه!
ناس كتير بتفكر إن أكل أموال الناس بالباطل يعني السرقة بس، لكن الحقيقة إنه يشمل حرمان حد من ميراثه، المماطلة في رد الحقوق، تعطيل مستحقات الناس، التهرب من الديون، أو استغلال الجهل بالقانون والدين. وربنا حذرنا وقال: "وَلَا تَأْكُلُوا أَمْوَالَكُم بَيْنَكُم بِالْبَاطِلِ" (البقرة: 188). والميراث بالذات ربنا قسمه بنفسه في القرآن، وسيدنا النبي ﷺ قال: "إن الله قد أعطى كل ذي حق حقه، فلا وصية لوارث" (رواه أبو داود). فمفيش حد عنده سلطة يمنع أو يغير في الحقوق دي، ولا يؤجلها بغير وجه حق.
واللي بيأكل حق الورثة أو بيماطل في رد الحقوق، ربنا توعده بأشد العذاب، وسيدنا النبي ﷺ قال: "مَن قَطَعَ مِيرَاثًا فَرَضَهُ اللَّهُ، قَطَعَ اللَّهُ مِيرَاثَهُ مِنَ الجَنَّةِ يَومَ القِيَامَةِ" (رواه ابن ماجه). تخيل تبقى واقف يوم القيامة ومستني رحمة ربنا، فتتفاجئ إنك محروم من الجنة بسبب حق منعته عن أهله!
لكن باب التوبة مفتوح، وربنا كريم، وقال: "إِلَّا مَن تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ" (الفرقان: 70). رمضان فرصة عظيمة إنك تنقي صحيفتك وترجع أي حق عندك قبل ما ييجي يوم "يَوْمَ لَا يَنفَعُ مَالٌ وَلَا بَنُونَ" (الشعراء: 88).
رجّع الحقوق، كلم أصحابها، اعتذر لو ظلمت حد، اسأل عن صاحب الحق في كل مكان، ورد الحق لصاحبه قبل فوات الأوان.
يمكن تكون دي أعظم عبادة تعملها في رمضان، وتكون سبب في قبول صيامك ودعواتك، وتبدأ صفحة جديدة مع ربنا!
