محمد وديع يكتب: تسريب بيانات العملاء في مصر قضية أمن قومي

"آه والله حصل" تبقى قاعد في أمان الله وفجأة تلاقي حد بيكلمك.. وبيعرض عليك العرض الخرافي للشركة الخرافية.. اشترك معانا مش هتلاقي زينا .. ورغي وحكي.. وبعدين تقوله طيب جبت رقمي منين.. يبلم الأخ وما يردش..

أحكي الحكاية بقى.. من كام يوم قاعد في البيت كلمني مندوب واحدة من شركات المحمول وخدمات النت الأرضي العاملة في مصر بخصوص التليفون الأرضي الخاص بالمنزل .. وقال لي اشترك معانا يا بك والعرض بتاعنا كيت وكيت .. قلت له تمام.. بس اديني فرصتي أسأل عليكم وسألت عليهم الخُبرا قالك لا ما تشتركش عندهم.. وبعدها سلسلة ملاحقات صبح ومسا.. المهم في النهاية رحت اشترك في شركة تانية لقيت الشركة الأولى مصنفة رقم البيت على أنه عليه نت من شركتهم.. انفعلت واتهمت الشركة اللي كنت بتعامل معاها انها اللي ادت الشركة المذكورة رقمي.. في النهاية نصحوني أتصل بالجهاز القومي لتنظيم الاتصالات وأحكيلهم اللي حصل.. بداية من التعاقد الوهمي على تليفوني لحد تسريب رقمي المحمول لمندوبي المبيعات..

المهم يا حضرات التواطؤ واضح .. حد بيسرب بيانات العملاء من داخل السنترالات لشركة منافسة وإحنا أرقامنا تبقى على المشاع..

طيب على فكرة دي قضية أمن قومي لأن كده أي حد يدفع ممكن ياخد بيانات زي ما هو عايز.. واتصلت بالشركة المسؤولة عن الخط الأرضي وقدمت شكوى .. ولا زلت منتظر النتيجة.. 

الفكرة كلها أن بيانات العملا دي حاجة سرية وكوني اديتها لشركة مش من حق حد يبيعها لشركة تانية.. أو لأي حد تاني.. احنا بلد لسه بننظم مسائل كتيرة وإن شاء الله نوصل الطريق الصح وكمان احنا بلد بتواجه ارهاب ولازم الموضوع ده ناخد بالنا منه ..

أنا دوشتكم بموضوع شخصي بس الحقيقة انه خطير جدا ولازم نتعامل مع شركات محترمة بتحافظ على بيانات عملائها مش حد بيبيعها من جوه..
مش هتكلم على الرصيد اللي بيخلص مش عارف إزاي ولا ولا.. بس لازم نحترم القانون ونعتبر بيانات أي عميل في الشركة سر من أسرار الشركة.. 

وبمناسبة بيانات البني آدمين في مصر الظاهر إن الشركات بدأت في مصر تمشي على خطى فيسبوك وجوجل وتبيع البيانات لطرف تالت.. ارحمونا.