الدكتور حسام حسن كاسب يكتب : أروح لمين
أعمل إيه لما أحس إن الدنيا معايا مش متظبطة
أبدأ منين وأروح فين
طبيب نفسي
أخصائي نفسي
مدرب تنمية بشرية
مدرب حياة
خبير طاقة
استشاري علاقات
شيخ
صيدلي
مهن ومسميات كتيرة والفروق مش واضحة لكل الناس والأمور متلخبطة
طبعاً في الأول والآخر مادام انت حسيت انك محتاج مساعدة، يبقى حقك الأصيل إنك تختار الشخص اللي تلجأله بالشكل اللي يريحك
بس تحديد المشكلة ومعرفة ايه المساعدة المناسبة ليها هايخليك تعدي المشكلة بسلام وبأقل خساير ممكنة في الصحة والوقت والفلوس
طيب لو اعتبرنا إن نفسيتك عبارة عن عربية
وانت ماشي بيها في حياتك
واتخبطت خبطة شديدة
أو حسيت إن فيها حاجة غلط
مابتسحبش
بتقطع
بتطلع أصوات
وحياتك نفسها ابتدت تتأثر وتتعطل
ساعتها إنت محتاج تروح وتاخدها ورشة تكشف عليها وتعرف العيب فين وتصلحة
مهندس الورشة دي هو الطبيب النفسي
(خريج كلية طب بشري معاه دراسات عليا في تخصص الطب النفسي)
المهندس بعد مايكشف عالعربية هايقولك فيها إيه وتعمل ايه
ممكن يقولك تجيبلها زيت أو قطع غيار
ممكن تبقى محتاجة جلسات سمكرة ودودكو
ولو مابتدورش خالص ممكن يعملها وصلة كهربا
ولو المشكلة كبيرة شوية ممكن يحجز العربية فترة في الورشة للتصليح
الأخصائي النفسي بقى
(خريج كلية آداب قسم علم نفس، وممكن يبقى معاه دراسات عليا في علم النفس)
ده الصنايعي الشاطر اللي في الورشة
وممكن يبقى فاتح ورشة لوحده كمان
ده المهندس بيبعتله العربية يعمل عليها اختبارات
ويبعتهالوا بردة لو العربية محتاجة جلسات سمكرة ودوكو
دوره مهم جدا علشان العربية ترجع زي الأول
وفي أوقات ممكن يبقى أهم من المهندس كمان
بس هو مش دوره إنه يشخص مشكلة العربية
ولا يقدر يكتبلها زيوت وقطع غيار
الصيدلي بقى هو اللي عنده الزيوت وقطع الغيار، وده عنده خبرة كبيرة في جودة القطع وكفائتها وأسعارها، بس ماينفعش تروح تشتري من نفسك قطع غيار للعربية من غير ماتعرف فيها إيه بالظبط، ممكن القطع دي ماتبقاش محتاجاها العربية، أو كمان ممكن تضرها أكتر ...
الترتيب الأصح لو حسيت إن نفسيتك فيها مشكلة كبيرة موقفة حياتك ومعطلاها:
إنك تكشف عند طبيب نفسي (أو أكتر) لحد ماتعرف تشخيص المشكلة, وتشوف معاه الحل، ممكن يبقى تدخل دوائي وتجيبه من الصيدلية (زيت وقطع غيار)، أو جلسات علاج نفسي عند الأخصائي النفسي (سمكرة ودوكوا), أو الاتنين...
من الحاجات اللي بتعمل لخبطة عند الناس إن بعض الدكاترة بيبقوا هما نفسهم مهندسين وصنايعية وبيشتغلوا جلسات بإيديهم، وده من ضمن نطاق دراستهم طبعا، ويحبذ إن يكون عندهم دراسات متخصصة في الجلسات دي، بس هما في الأصل دورهم التشخيص والعلاج زي كل فروع الطب، على الناحية التانية الأخصائي النفسي ماينفعش تحت اي ظرف يكتب علاج دوائي أو يعدل عليه، ممكن يبعت ملاحظاته للطبيب المعالج، بس يعدل من نفسه لأ طبعا، والاستثناء الوحيد لكدة موجود بس في خمس ولايات أمريكية وده بردة حصري للأخصائيين النفسيين الحاصلين عالدكتوراه وخاضوا تدريب شامل للعلاجات وتأثيرها ومعاهم رخصة لوصف العلاج من الجمعية الأمريكية للطب النفسي)
طيب ايه حكاية بقى مدربين الحياة والتنمية البشرية والكلام ده
مدرب الحياة
(مش شرط يكون خريج كلية معينة، بس ممكن يبقى معاه كورس أو حاجة في التدريب الحياتي، أو هو نفسه عنده خبرة حياتية معينة وعاوز ينقلها للناس)
ده بتروحله لو العربية سليمة بس عندك مشكلة في السواقة
بتركن غلط، بتمشي بطيء، بتتوه في الطريق
ده بيديك خبراته في السواقة ونصايحة علشان تتصرف صح
لكن لو رحتله أصلا وعربيتك (نفسيتك) بايظة
مهما قالك إزاي تسرع
وعربيتك فيها مشكلة أصلاً مابتسحبش
عمرك ماهاتسرع
وهاتحس ان المشكلة صعبة ومالهاش حل
وتتدهور أكتر
مدرب التنمية الشرية
(ده بردة مش شرط يبقى خريج كلية معينة، بس ممكن يبقى معاه كورسات في التنمية البشرية أو شاف محاضرة لد/ إبراهيم الفقي الله يرحمه)
ده بتروحله بردة لو العربية سليمة بس عاوز تستثمر فيها وتستغلها أحسن
عاوز تشغلها أوبر مثلا وتزود انتاجها، أو تسوقها بطريقة تقلل استهلاكك للبنزين
ساعتها هايعرفك خطوات النجاح ويديك أمثلة حياتية لناس استثمروا ونجحوا ويشجعك عالمخاطرة والاستثمار
ده لازم تروحله وعربيتك زي الفل، علشان تعرف فعلا تستثمرها
لكن لو روحتله بعربية خربانة، وهو قعد يشجعك تحولها أوبر، هاتبوظ أكتر والمشروع هايفشل وهاتقعد جنبها بتعيط وغرقان في دموعك وفي الديون
خبير طاقة
(ده بردة مش شرط يبقى خريج أي حاجة، بس ممكن يبقى قرا في الموضوع او شاف ڤيديوهات عاليوتيوب)
ده بتروحله لو عاوز تحط شوية إكسسوارات في العربية
مفيش مانع تعمل شكل حلو للعربية وده يريحك
بس بردة أوعى تروحله بعربية بايظة
ماهو أكيد يعني عربية الفيتيس فيها معلق مش هاتنقل السرعة لو حطيت خرزة زرقا عالمرايا...
استشاري علاقات زوجية
(دول بردة مش شرط يبقوا خريجي كلية معينة، بس ممكن يبقى معاهم دبلومة أو كورس مخصص لعلاج الأزواج)
دول بتروحلهم بقى لو عربيتك سليمة وعربية شريكتك سليمة، بس مابتعرفوش تكملوا مشوار مع بعض، بتتوهوا، سرعاتكم مختلفة، انت بتحب تقف عند كل عربية فول وهى بتقف عند كل مول، ساعتها هو بيدلكم ازاي تلاقوا نقط مشتركة تتقابلوا فيها وبردة تحترموا النقط المختلفة
بس لو فيه عربية من الاتنين أصلا بايظة لازم تتصلح الأول علشان تقدر تنفذ التوصيات المطلوبة وماتقعدش تحدف عالعربية التانية وتخبط فيها والاتنين يبوظوا
الشيخ
(ده رجل دين يفضل طبعا يكون خريج كلية أزهرية زي الدراسات الإسلامية والعربية أو أصول الدين والدعوة, أو معروف بالتزامه ومعاه دراسات في العلوم الإسلامية)
ده بيبقى زي ظابط المرور
بتروحله علشان تسأله عن قوانين المرور ومعلومات عن الطرق والكباري، وممكن يساعدك تبعد عن المخالفات أو يعرفك إزاي تتشال عنك...
بس بردة لو العربية مافيهاش فرامل مثلا وكسرت إشارة
يبقى الأول نصلح الفرامل وبعدين نبقى نشوف هانعمل إيه في المخالفة
لكن لو روحتله علشان تصلح الفرامل، ممكن يحاول يساعد من باب الطيبة والانسانية، بس تطلع تلاقي الفرامل بردة لسة بايظة فاتقول بقى خلاص مافيش فايدة هامشي بسرعة واللي يحصل يحصل، أو تفضل راكن العربية وخايف تطلع بيها وبتقول إذا كان الظابط مش عارف يصلحها من هايصلحها...
في الآخر
للي وصل للآخر يعني
في طريق الحياة اللي ماشيين فيه
زي ماعينك على الطريق
خلي عين على عربيتك
دايما اعرف نفسيتك محتاجة إيه
وعلى قد ماتقدر لبيه
ماتستكترش حاجة على نفسك
لو حسيتها محتاجة تجري اجري
محتاجة تقف اقف
محتاجة دلع دلعها
محتاجة خروجة حلوة اخرجها
وماتنساش الصيانة
صحتك وأكلك ونومك وعلاقاتك باللي حواليك
علشان ماتحتاجش بعدين للورش
كاتب المقال الدكتور حسام حسن كاسب إستشاري الطب النفسي
